Contra o esquecemento

Como sabedes o historiador Dionisio Pereira foi denunciado pola familia de Manuel Gutiérrez, o que fora alcalde de Cercedo baixo o franquismo, por relacionar ao tal coa represión fascista. Unha frase no seu libro A IIª República e a Represión franquista no Concello de Cerdedo e máis outra recollida nas Actas do Congreso da Memoria (Narón, 2003) serviron para esixir unha retractación e máis unha indemnización pecuniaria. Hoxe fracasou o acto de conciliación ao que estaba convocado e o proceso seguirá pola vía civil. Dionisio xa ten expresado a súa negativa, tanto a retractarse como a empregar as súas fontes orais como testemuñas.
Asistimos unha vez máis á tentativa de criminalización e silenciamento da nosa memoria histórica, ademais da tentativa de mudar a historia de lugar e poñerse agora no lado das víctimas. Non hai moito Marianito avisaba que a el non lle interesaban as historias dos suevos (sic), senón saber que o Estado español estaba entre as oito primeiras potencias europeas. Gustaríame verlle explicando sucesos así en persoa aos dirixentes dalgunha desas potencias, especialmente aos daquelas que viviron reximes fascistas aos que a comunidade internacional non deixou seguir existindo.
Neste enlace atoparedes máis información, ademais dunha serie de correos onde amosar a vosa solidariedade con Dionisio.